لجنة أدعياء المهنة وفقاً لقوانين دولة الكويت
السؤال :
السلام عليكم ورحمة الله وبركاته
أخواني الاساتذه الكرام
تحيه طيبه
قبل سنتين صار بيني وبين بنكي اشكاليه على القرض ورفعو علي قضيه وأخذو أمر اداء علي وحكمت فيه لصالح البنك ونفذ علي الاجراءات فكنت بالمحكمه كوني أجهل القانون وما لي وما علي كنت أسأل مندوب البنك وأحاول أتوصل معاه لشيء يرضي الطرفين وأنا لا أعلم عن الاجراءات ولا أفهم فيها نهائي ماوصلت معاه لحل
وانا اذكر شخص مره جاني بالمحكمه وخدمني مقابل أجر ووافقت قلت بتصل عليه وأخذ رأيه وكلمته قال الامر بسيط جدا الضبط والاحضار أوقفه لك بأشكال والتظلم وبيندب من المحكمه خبير وأتفقنا على هالشيء وحدد الاجر ودفعته كان 850 دينار . وبعدين بالجلسات مابعد الخبير له حساب ثاني ووافقت قام وقدم اشكال ووقفه شهرين وبعدها ماكمل خطوة التظلم بحجة ان القاضي مع البنك !!! ورفضو ندب الخبير حسب كلامه قلت شلون مع البنك قال حكم لصالحهم وما وافقو على تظلمك رفضه بالحكم ؟؟
وقال الامور متعقده وأنا ماقدر أسوي شيء بدزك على واحد بالبنك وروحله طالعته قلت أنت محامي ولا مخلص معاملات أنا شاكي على البنك وتدزلي لواحد وليش مو أنت خادم البنك على حسابي !! قام يحلف ويتكفر ومثلكم عارف حنا يالكويتيين طيبين سامحته وجيتها بعدها بمطالبتين ماليتيين بعقود وشهود وقلت له ينجزهم لي وانجزهم واخذ اجره
المصيبه الان احد محلات السيارات وكنت متعاقد معاهم من سنة 2004 الى سنة 2008 استغل ضدي كمبياله قديمه من ست سنوات اعتقدت انهم لغوها وعباها قبل سنه وقدمها قمت وسويت تظلم وسويت اشكال عند نفس هالشخص هو مستشار المكتب جابلي بالتظلم للاطلاع واجلوها لشهر 9 وبالاشكال ماسوالي شيء ورفض الاشكال الان أنا أصابني الضرر من هالشخص هداه الله
أقدر أقاضيه أو أتوجه للجنة أدعياء المهنه وأشكيه عن قضيتي للبنك اللي ضيع علي أخر بصيص أمل ،، هالاسبوع ضيع علي الاشكال وهل اللجنه مع كامل احترامي لها بتكون مع المحامي ؟ ولا مع الحق وشنو ممكن يعملون له بعرف تبعاتها اذا حقي محفوض ورد اعتباري محفوض بروح لهم ,, فيدوني مع الشكر .
الاجابة :
ياخوي انت الله يهديك تارك مكاتب الفين محامي كويتي ورايح لشخص ما عنده مكتب وغير مسجل محامي!!! والله فاجئتني بانك دافع له 850دك !!! صدقني لو رايح بعض مكاتب المحامين الكويتيين يقبلون مثل هالاتعاب دل ادعياء المهنه اللي ينصبون على الناس والاغرب ان متعامل معاه باكثر من قضيه !!
عموما اذا عندك اثباتات ان هو متعامل معاك وهو اللي قام لك بالعمل .. تروح جمعية المحامين .. يوجهونك لتقديم شكوى ضد الشخص .. وهو يقولون لك التفاصيل واذا ما عندك اثبات … الله يعينك
للاسف ان بعض المحامين يؤجرون مكاتبهم لادعياء المهنه .. وفي مثل حالتك لا تستطيع الشكوى ضده لانه يستعمل اسم المحامي الكويتي وبالتالي الكويتي سيقول انه مفوضه لللاتفاق .. وطبعا هو لا ممسك ضده سيقول انه انجز العمل الموكل اليه
الله يعينك .. ليس لك حل اما ان تكمل معه .. او تكمل قضيتك بنفسك .. او تستعين بمحام اخر ولا يتصور تواطئه مع البنك وانا اعتقد ان موقف اصلا ضعيف في القضية وهو استغلك للحصول على الاتعاب وهو يعلم انه لا فائدة من قضيتك
والله اعلم
اعادة نشر بواسطة لويرزبوك .
لجنة أدعياء المهنة وفقاً لقوانين دولة الكويت